Informashon general

Na nos departamentu di Atmishon tin e posibilidat pa registrá pa por wòrdu atmití. Atmishon ta tuma lugá promé di un operashon òf tratamentu (intensivo) pa nos spesialistanan por opservá rekuperashon di e pashѐnt. Un bon preparashon promé ku atmishon ta sumamente importante.

Identifikashon

Segun lei hòspital ta obligá di kontrolá e identifikashon di seguro di kada pashènt. Tambe ta nesesario pa trese e papel di seguro ku su number di pólisa válido.
Den kaso di un atmishon ta planiá òf si bo a ser atmití den hòspital ku urgensia, bo mes ta responsabel pa regla un karta di garantia di bo seguro.


Kuenta Propio

Si bo no tin un seguro válido òf si bo no ta sigurá, tur gastu di atmishon i gastu médiko lo ta riba bo propio kuenta. Na Departamentu di atmishon lo bo tin ku firma un karta di garantia i tambe depositá un suma adelantá. Bo por haña e tarifanan aki na Departamentu di Atmishon. E tarifanan aki ta varia segun bo klas i bo statuto.

Konfirmashon di bo Registro

Den kaso ku bo atmishon ta planiá bo mester konfirmá esaki un dia promé via telefòn. Bo por yama entre 4or pm – 8or pm na number di telefòn: (+5999)4624505. Aki nan lo bo wòrdu pone na altura ta kuant’or lo bo mester mèldu bo mes e siguiente dia.

Kanselashon di un atmishon plania- òf operashon

Pa kambia òf kanselá e fecha di un atmishon plania òf operashon mester tuma kontakto ku Departamentu di Atmishon na number di telefòn (+5999)4624505 por lo ménos ku 24 ora promé ku e dia plania pa bo atmishon den Sint Elisabeth Hospital. E ora ei nos lo por programa bo operashon / atmishon pa un otro fecha. Si bo no hasi esaki na tempu, hospital lo kobra abo tur gastu.

Klas

En prinsipio bo tin derecho di wòrdu hospitalisá den e klas ku bo ta sigurá pe. Por sosodé ku e kamanan den e klas ku bo seguro ta kubri, no ta disponibel (temporalmente). Si esei ta e kaso lo bo wòrdu traspasá pa un otro klas. Esaki por ta sea un klas mas haltu of mas abou di loke bo seguro ta kubri. Si bo wòrdu traspasá pa un klas mas haltu i bo ta deseá di keda den e klase aki aunke ku a logra pa por traspasá bo bèk pa e klas ku bo ta sigurá pe, for di e momentu ei 
St. Elisabeth Hospital lo pasa tur èkstra kosto ku ta konta pa bo estadia den e klas mas haltu aki riba bo propio kuenta (eksklusivo e kosto di honorario di spesialista). Tambe lo pidi bu pa un depósito di un parti di e suma aki inmediatamente.

‘Rooming in’

Un miembro di famia òf pariente solamente por keda drumi serka e pashѐnt den hòspital na momento ku e pashѐnt ta kedando den e promé klase òf riba Departamentu di mucha i tambe solamente si tin un kama ѐkstra òf strѐcher disponibel. E kostonan pa hospedá serka e pashѐnt lo ta pa e pashѐnt mes (òf representante legal).

Representante

Den kaso ku bo no ta kapasitá i / òf ta sufri di algun malesa mental bo por nombra un representante. E persona aki no nesesariamente, pero por ta e mesun persona ku bo a señalá komo persona di kontakto.

Ken por ta un representante i kiko ta su derecho nan?

Den lei tin poné ken tur por ta un representante:

Curator of konsehero (nombrá dor di un wes); un apoderado (gemachtigde) por eskrito; kasá; esposo; pareha registrá pa lei òf kompañero di bida; mayor, yu òf ruman. Si no tin un curator of konsehero, e interesnan di e persona kende ta wòrdu representá lo ser tratá via di un apoderado por eskrito. Si tampoko no tin un apoderado por eskrito, e ora ei e persona ku lo wòrdu señalá komo representante ta e kasá, pareha òf kompañero di bida di e pashènt. Den kaso ku e pashènt no ta kasá ni tampoko no tin un pareha e ora ei e por wòrdu representá dor di su mayornan, yu (nan) òf ruman (nan). Entre nan, nan mester tuma un desishon kua miembro di famia lo tuma e responsabilidat aki. Si famia no por yega na un akuerdo di ken lo bira e representante e ora ei dòkter mes lo nombra un representante.

Pa por kumpli ku e tarea di un representante di un manera mas optimal posibel, e representante tin derechi riba informashon i tambe derechi pa kontrolá e file di e pashènt. E representante lo ser informá te kaminda esaki ta nesesario na ora di tuma desishon.

Den kaso ku abo mes komo pashènt kier disidí ken ta bira bo representante, bo mester avisá esaki por eskrito. Pa esaki tin mester di un formulario ku ta optenibel na e departamentu di Atmishon.

Informashon di kontakto

Breedestraat 193
Otrobanda
Willemstad, Curaçao

Yamadanan sentral
(+5999) 462 4900 of 910