Departamentu voor Hygiëne en Infectiepreventie (HIP)

Zoeken
Hygiëne en Infectiepreventie (HIP)
Telefoon: 4321071 ekstenshon 1207 / 1209
Omschrijving:

HIP

HIP ta para pa Hygiëne- en Infectiepreventie. E departamentu di HIP ta okupá su mes ku prevenshon, investigashon i kombatishon di infekshonnan den hòspital. Pa por evitá profilerashon di organísmonan micro patógeno den nos hòspital, nos ta pone atenshon na higiena di empleadonan di SEHOS, nos bishitantenan i tambe na bisendario di nos hòspital. 

Map di pròtòkòl

Riba kada departamentu den St. Elisabeth Hospital por haña e mapnan di pròtòkòl ku indikashon di prevenshon di infekshon.

Huntu nos ta krea un ambiente limpi i sigur tantu pa nos empleadonan komo  nos bishitantenan.

MRSA

Un hende por ta portador di Staphylococcus aureus, un bakteria ku hopi biaha ta enkontrá den nanishi pero tambe den otro parti di kurpa. Mayoria biaha e bakteria no ta peligroso pa salú, pero den sierto kaso e por kousa ‘blufein’ òf  por ta e kousa ku un herida ta forma püs. Si e infekshon ta serio por trata e bakteria aki bon ku antibiótiko komun manera por ehèmpel penisilin.

Tin un sierto tipo di e bakteria Staphylococcus aureus ku no por trata ku antibiótiko komun. E tipo di bakteria aki no ta reakshoná riba e antibiótiko Methicilline i yama MRSA e abreviashon pa ‘Methicilline Resistente Staphylococcus Aureus’. Pa kombatí e infekshon kousá pa e bakteria akí lo mester usa antibiótiko mas fuerte, i e aplikashon mester tuma lugá pa medio di un infüs. Den kaso ku mester usa e antibiótikonan mas fuerte e reakshon (‘bijwerking’) por ta mas fuerte i estadia den hòspital ta dura mas largu.

Pafó di hòspital e bakteria akí mayoria biaha no ta hasi masha daño, komo ku mayoria hende ku ta karga e bakteria den nan kurpa ta pèrdè e despues di tempu sin ku nan tabata na altura ku nan tabata tin e bakteria. E bakteria ta peligroso si pa persona ku un resistensia abou, òf persona ku a kaba di operá òf ku tin ku operá.

Infekshon ku MRSA den hòspital

Den un hòspital tin hopi hende huntu i serka di otro. Esaki ta hasi e chèns mas grandi ku un hende por pega otro ku bakteria. Komo ku pashènt tin ménos resistensia i nan ta  mas delikado, mas lihé nan por haña un infekshon. Pa e motibu ei sigur mester evitá ku MRSA por plama. Transmishon di MRSA por tuma lugá via di man i for den aire. Pa e  motibu akí tratamentu di persona kontaminá ku e bakteria mester tuma lugá den isolashon. Nos ta papia di Kuido Isolá.

Kuido Isolá

Prekoushon ta masha importante pa evitá ku e bakteria ta plama den hòspital. Na momentu ku a konstatá ku un pashènt ta karga e bakteria MRSA, lo dun’é kuido isolá.

Por lo general un persona no sa ku e ta portador di e bakteria MRSA, pasombra no tin síntoma spesífiko. Hopi biaha por enkontrá un pashènt ku ta portador di MRSA pa kasualidat, por ehèmpel den kaso ku a laga hasi un kultivo di por ehèmpel un herida ku no ta duna e resultado ku ta spera di un antibiótiko komun.

Segun e protokòl di Hospital St. Elisabeth  personanan ku a drumi mas ku 24 ora den un hòspital den eksterior (pafó di Kòrsou), na atmishon den Hospital St. Elisabeth, mester hasi tèst di laboratorio bakteriológiko pa kontrolá si e persona ta portador di MRSA  E resultado di e kultivo ta konosí despues di 5 dia. Durante e temporada aki e persona ta haña kuido isolá estrikto.  Unabes ku e tèst ta mustra ku un persona tin e bakteria, pues e resultado di kultivo ta positivo, e pashènt ta keda isolá. Si e resultado ta negativo e persona ta sali for di isolashon.

Kuido Isolá estrikto ta nifiká

Ta pone e pashènt den un kamber di un persona. E porta di e kamber mester keda sera.

E empleado ku atendé ku e pashènt mester bisti un bata ku manga largu, un masker riba boka/ nanishi, pèchi i hanskun. E medida di prekoushon akí ta pa evitá ku e empleado  por pega otro pashènt.

Mester laba man bon ku awa i habon i ta desinfektá e man ku un alkohòl spesial pa man, despues ku a kaba yuda e pashènt.

Durante 5 dia e pashènt tin ku baña henter su kurpa (tambe kabei) ku betadine shampu i mester usa un zalfi pa nanishi: Bactroban. Despues di e kùr ta warda dos dia promé ku ta ripití e kultivonan.

Ounke un pashènt ta portador di e bakteria MRSA, saminashon i tratamentu nesesario ta sigui normal; Den mayoria kaso nan ta tuma lugá na final di dia i final di e programa di e departamentu, pa despues por desinfektá e aparatonan i e kamber kaminda e tratamentu a tuma lugá.

Un mensahe general di e tim di HIP 

Por prevení kontaminashon ku bakteria, dor di semper laba man despues ku sali for di baño òf ora supla nanishi. Awendia tin un alkohòl spesial pa man (un tipo di djèl), ku por huza na momento ku no tin awa òf habon optenibel.

Bai bèk

Trefwoord(en): HIP, higiena, prevenshon

Informashon di kontakto

Breedestraat 193
Otrobanda
Willemstad, Curaçao

Yamadanan sentral
(+5999) 462 4900 of 910