Anestesia

Zoeken
Anestesia
Telefoon: 4321071 ekstenshon 2920
Omschrijving:

Promé ku bo bai hasi un operashon na hòspital, of promé ku un èksamen ku ku ta rekerí anestesia / narkósis bo ta pasa serka un anestesista. Bo promé enkuentro kuné lo ta dia di bo sita na Poli Anestesia, despues ku bo a bai e siruhano.

Anestesia ta hasi bo múskulonan mas slap. P’esei bo mester ta na yuna. Bo no tin mag di kome ni bebe, tampoko awa of te , ni kou bals. Si bo kome òf bebe, bo por arohá e kontenido di bo stoma durante òf dirèkt despues di e operashon.

Tin 3 sorto di anestesia

  • Narkósis general (ta manda bu temporalmente leu / bou di narkósis)
  • Anestesia regional (ta dof solamente sierto parti di e kurpa. Ku e anestesia aki bo ta keda en prinsipio na bo tinu / lantá)
  • Anestesia lokal (ta dof un parti chikitu di bo kurpa)
     

E anestesia ku bo ta haña ta dependé di

  • Bo edat
  • Bo kondishon físiko
  • Bo operashon / èksamen

Bo por duna tambe bo preferensia, pero ta e anestesista ta konsiderá kon leu por tene kuenta ku esaki, dependiendo di bo situashon.

Preparashon

E dia promé ku bo operashon ta hasi e preparashonnan nesesario. Riba e dia di bo operashon bo ta haña di bo anestesista un tablèt (tin biaha un inyekshon) ku remedi delantá. Ta trata akí di remedinan ku ta prepará bu pa narkósis. Ora bo bùrt yega ta hiba bu e kamber di preparashon den sala di operashon. E anestesista ta studia bo státus i e ta splika kiko ta bai sosodé. Alergía, remedi, malesa, humamentu i uso di alkohòl, tur tin influensia riba bo anestesia. Informá e anestesista riba un ke otro.

Despues di e operashon

Despues di operashon ta hiba bu sala di rekuperashon. Bo ta keda aki te ora bo kondishon general ta stabil i safe.

Kiko ta e efektonan ku bo por spera?

Doló: despues di e operashon, ora e anestesia stòp di traha, bo por sinti doló. Si bo tin hopi molèster, bo por pidi e enfermera/o algu pa pasa doló.

Walmentu di stoma: despues di bo operashon bo por sinti walmentu di stoma. Esaki ta dependé di e tipo di operashon i e klase di anestesia. Si bo ta sinti molèster, bo por pidi e enfermera/o algu pa e walmentu di stoma.

Molèster pa move : si bo a haña un prek den bo lomba ( anestesia regional), bo no por move e parti abou di bo kurpa den e promé 4 pa 6 ora. Doló di múskulo despues di e operashon no ta algu inusual. Oriná despues di un operashon ta resultá un poko difísil, p’esei bo por haña un kateter pa bo blas.

Iritashon di garganta: despues di e operashon por resultá ku bo tin un heful pisá òf kishikimentu patras den bo garganta. Esaki ta resultado di e slang fini ku tabata den bo garganta, pa regla bo halamentu di rosea durante e operashon.

Generalmente nos ta konsehá bu pa ora bo spièrta bo hala rosea de bes en kuando profundamente aden i sak’é afó bon. Esaki ta bon pa bo pulmonnan. Pa chikitu ku bo operashon por ta, ta konsehabel pa bo bai poko poko. Bo kurpa gradualmente mester rekuperá despues di e operashon òf saminashon.

Tin riesgo mará na un anestesia ?

Komplikashonnan grandi ta un eksepshon. Esaki prinsipalmente ta debí na mehorashonnan di siensia médiko, tékniko i disponibilidat di remedi i aparatonan mas safe.

Bai bèk

Trefwoord(en): Anesthesie, Anestesia

Informashon di kontakto

Breedestraat 193
Otrobanda
Willemstad, Curaçao

Yamadanan sentral
(+5999) 462 4900 of 910