Intensive Care (IC)

Zoeken
Intensive Care (IC)
Telefoon: 4624900 ekstenshon 8601
Omschrijving:

Intensive Care ta nos departamentu ku ta...

Bo famia ta interná na e departamento di Kuido Intensivo. Mihó konosí komo Intensive Care òf IC den boka di personal. Na e departamento aki ta trata pashènt ku tin mester di mas ku e kuido regular.

Atmishon na e departamento akí ta hasi hopi impreshon riba e pashènt i su famia. Pa medio di e foyeto aki nos ke duna  informashon práktiko tokante funshonamentu di e departamento.                  

Departamento di Kuido Intensivo

E departamento di IC ta un departamento será. Na yegada primi e bèl na porta(na man drechi) i un persona lo atendé bo. Por sosodé ku nos por pidi bo pa warda un ratu. Na e departamento ta traha enfermeronan spesialisá, ku ta opservá e pashènt kontinuamente pa medio di aparatonan sofistiká. Ku atenshon ta kontrolá entre otro preshon, rosea i kurason i si ta nesesario por aktua inmediatamente.            

Orario di Bishita

E orario di bishita ta:11.30-12.30 or i 17.30-19.00 or.

Bishita pafó di e oranan aki por solamente despues di a konsultá ku e enfermero. Normalmente no ta permití muchanan bou di 13 aña.Ta hasi eksepshon den kasonan spesífiko. Konsultá promé ku un miembro di personal di  e departamento.

Sala di espera

Nos tin un sala di espera. Famianan por hasi uso di dje si e situashon ta hasi esaki nesesario.

Informashon general

Bishitanan mester sigui e instrukshonnan ku e enfermero di IC ta duna, na tur momento.

Nos ta konsehá pa famianan yegá so bin di bishita.

Nos ta supliká un máksimo di dos bishitante pareu na kama di e pashènt. Si tin mas bishitante por kambia ku otro durante e ora di bishita.

Si bo ta na kas i bo ke sa kon a bai ku bo famia, bo por yama nos 24 ora pa dia ku eksepshon di e oranan di traspaso ku ta entre: 6.30-7.00 or, 14.00-15.00 or i 22.25-23.00 or. Nos ta preferá si pa un miembro di famia tene kontakto telefóniko ku nos. E na su turno por informá e demas famia.

Nos ta suministrá informashon hopi delikado solamente na e persona (nan) di kontakto.

Si bo ta deseá di traha un sita ku e spesialista ku ta trata e pashènt por hasi esaki via di nos enfermeronan òf por yama e ofisina di e dòkter pa traha un sita

Reglanan general di Departamento di Kuido Intensivo

E bishitante mester desinfektá su mannan promé ku drenta den e departamento (tin un “dispenser” di alkohòl na porta di entrada) i tambe  despues ku e ta bandoná e kama di e pashènt (“ dispenser” di alkohòl na e kama).

Pa evitá kontaminashon di un pashènt pa ku otro, esaki na bienestar di bo ser kerí, ta prohibí pa bishitá otro pashènt ku ta den Hòspital.

Bishitantenan no tin mag di kome den e sala di kuido i solamente despues di a konsultá, por trese kuminda di kas pa e pashènt.

Telefòn selular, tantu di e bishitante nan komo di e pashènt mester ta pagá i wardá.

Otro pashèntnan ku ta den Hòspital no tin mag di hasi bishita. Solamente si a konsultá ku e enfermero.

Sakamentu di portrèt i filmamentu no ta permití riba IC. Tin  kasonan di eksepshon, i e enfermero lo informá bo tokante di e proseder ku mester sigui.

Bai bèk

Informashon di kontakto

Breedestraat 193
Otrobanda
Willemstad, Curaçao

Yamadanan sentral
(+5999) 462 4900 of 910