Radiologia

Zoeken
Radiologia
Omschrijving:

Bo spesialista a mandabo departamentu di Radiologia di nos hòspital pa hasi un saminashon di MRI, ku ta nifiká Imágen Resonansia Magnétiko (Magnetic Resonance Imaging). E ta un saminashon kaminda un kampo fuertemente magnetisá ta produsí señalnan den bo kurpa. Un antèna ta kapta e señalnan aki i ta mandánan pa un kòmpiuter. E kòmpiuter ta prosesá e señalnan i ta traha un imágen di e parti konserní di bo kurpa. E kampo magnetisá no ta malu pa salú di hende.

No ta tur hende por hasi e saminashon di MRI

Pashènt ku pacemaker no por hasi un saminashon di MRI, pasobra e kampo magnetisá por bruha funshonamentu di e pacemaker.

Pashènt ku pida metal chikitu den wowo, tampoko no por hasi un saminashon di MRI.

Hendenan ku ta las òf otro persona ku ta traha ku metal tin mas chèns di tin e problema aki.

Tin chèns ku pa diferente motibu e siguiente personanan no por hasi e saminashon di MRI:

Pashènt ku sierto implante médiko manera prótesis ortopédiko, plancha di dentadura ku metal òf klèpnan vaskular espesialmente esnan di mas ku 10 aña bieu.

Pashènt ku ophetonan straño den nan kurpa, manera splènter di metal, bala di hagel òf bala di arma di kandela.

Den kada kaso lo evaluá si e pashènt por hasi e saminashon di MRI.

Preparashon

Pa e saminashon di MRI no tin preparashon spesial. No tin mester di ta na yuna. Bo por kome i bebe normalmente. Si ta hasi un saminashon di MRI di kabes, ta mihó no usa spray di kabei ni makiyahe. Nan por kontené supstansianan di metal. Si ta hasi MRCP, mester tin 4 ora na yuna. Pa motibu di e kampo magnetisá, no ta permití pa drenta ku ningun opheto ku ta kontené metal, den e kamber kaminda e aparato di MRI ta. Por ehèmpel no tin mag di drenta ku karchi di banko, telefon selular, prenda, yabi, plaka larga i artíkulonan pa wanta kabei. Tambe mester kita plancha di djente ku ta kontené metal, aparato pa tende i brel.

E saminashon

E scanner di MRI ta un aparato grandi ku un tùnel horizontal habri na kada banda, ku lus. Pa e saminashon e laborant ta kologá un antena na e parti di e kurpa konserní, por ehèmpel na kabes, rudia, skouder, barika, pechu òf pia. Lo pidi bo pa drumi riba e mesa ku ta subi i hala bai den e tùnel di MRI. Den e tùnel lo hasi grabashon di e parti di kurpa ku tin ku eksaminá.

Una bes den e MRI, ta hopi importante pa bo keda hopi ketu drumi. Si bo move, e imágennan ta faya i mester ripití e tèst. Tur esaki ta pone ku e saminashon lo dura mas largu. Por sosodé ku e laborant promé òf durante e saminashon, ta pasabo un angua ku líkido di kontraste den un ader di bo brasa.

Ta permití un otro persona pa keda ku personanan nervioso òf muchanan chikitu durante e saminashon. Personanan ku ta sufri di kloustrofobia – kier men ku nan ta ansha den lugánan chikitu – mester avisá nan spesialista promé ku nan bai hasi e saminashon di MRI.

Durashon di e saminashon

E saminashon por dura di 20 – 60 minüt.

Bo ta keda bo so den kamber, pero e laborant tin bista konstantemente riba bo pa medio di un kámara. Tambe por papia ku e laborant via di un intercom.

Durante e saminashon e aparato ta produsí un zonido duru. Pa redusí e zonido aki bo ta haña un ‘headphone’of ‘earplug’ pa tapa bo oreanan. Tambe bo ta haña un bèl di emergensia den kaso bo kier avisá e laborant pa stòp e saminashon pa un òf otro motibu.

E radiólogo ta kontrolá e potrètnan. Despues e ta traha un rapòrt di e resultadonan di e saminashon i ta pone bo spesialista na altura di esaki.

Bai bèk

Informashon di kontakto

Breedestraat 193
Otrobanda
Willemstad, Curaçao

Yamadanan sentral
(+5999) 462 4900 of 910