Historia

Un tiki di nos historia

Promé ku aña 1855 tabata tin kustumber di kuida enfermonan na kas. Solamente hendenan ku moda tabata tin nan dòkter di kas privá pa trata nan. E dòkter aki tabata indiká e sirbientenan na kas kon mester a sigi kuida e hende malu. Banda di hasi uzo di un dòkter di kas privá tambe tabata kustumber pa bai serka un kuradero (medicijnman na hulandes). Kuraderonan tabata hendenan, sea hòmber òf muhé, ku pa tradishon a atkirí nan konosementu dor di e generashon promé ku nan. Ta te ora resultá ku niun remedi di kas no ta yuda mas, tabata buska yudansa di un dòkter.

Den kurso di siglo 19, Iglesia Katóliko a hunga un ròl importante den sektor di kuido médiko i di hòspitalnan ora ela enkargé ku kuido di hende di menos rekurso, entre nan prinsipalmente katibu i ѐks-katibu. Por ehѐmpel na 1830 Mgr. M. J. Niewindt a lanta un fondo pa hende pober bou di e nòmber “R.K. Maatschappij van weldadigheid”, pa no solamente yuda e ѐks-katibunan ku no por a konta mas ku nan doño lo perkurá pa nan, pero tambe R.K. Maatschappij tabata okupá su mes ku e entiero di hende di menos rekurso. Di e manera aki “R.K. Begrafenissociëteit Christelijke Weldadigheid” a ser fundá i nan yudansa tabata enserá un kaha di morto simpel, kubrimentu di gastu di graf i un santu sakrifisio di misa pa dekanso di alma di e defuntu.
E promé miembronan di direktiva di e sosiedat di entiero tabata presidente J.L. van Roermond sigí despues pa kapelan F.E.C. Kieckens, G.M. Calvo, B.H.J. Huycke, J.D. Pradel, i N.J. Dania. E direktiva aki tabata di opinion ku ‘si mortonan tabatin derecho di risibí kuido, tantu mas esaki mester a konta pa hende bibu, spesialmente pa esnan enfermo entre nan.’ I asinaki e idea pa traha un Hòspital a nase.

Mgr. Kieckens, fundadó di St. Elisabeth Gasthuis
Den un reunion ku a tuma lugá dia 11 di fëbruari 1855 a disidí na tene un kolѐkt general ku e meta pa traha un hòspital. A anunsiá na tur misa durante di predikashi ku lo tene un kolѐkt general i tambe esaki a ser anunsiá den Curaçaosche Courant. Durante di e reunion di 24 di aprel 1855 presidente Kieckens a anunsiá ku e kolѐkt general tabata un éksito i ku a sera 3000 florin. Esaki no tabata bastante pa kubri tur kos nesesario pa e hòspital i a puntra yudansa di Hulanda pa manda e remedinan prinsipál huntu ku 14 kòt di heru ku mester a fungi komo kama di hòspital. Na banda di esaki Mgr. Niewindt a aserka Obispu di Breda i a pidié pa manda dos sùr di Breda bin traha na Kòrsou.
A funda e hòspital di 1855 den e edifisio  na Otrabanda den Ijzerstraat Tabata yama e hòspital aki ‘Hòspital na Seru di Klep’.

E último lugá di sosiegu di Mgr. Kieckens ta den St. Elisabeth Hòspital na man drechi di e hal, na e piso abou, direkshon di Departamentu di hende muhé. Riba e plaka konmemorativo di piedra di santu tin skibí na latin: Hic jacet Rmus, Dom. F.E. Kieckens CAM Hon. Leon XIII Pap. Hujus Domus Pius Fundator Obiit 8 Dec. 1893 RIP. Esaki ta nifiká: Aki ta sosegá Muy Reverendo F.E. Kieckens, Chambelan di honor di Papa Leon XIII, fundador piadoso di e kas aki. Ela fayesé dia 8 di dësѐmber 1893. Ku e sosegá na pas.  
 

E logo di hòspital
Logo di nos hòspital tin un forma apstrakto di koló blou i hel. Splikashon di e logo ta lo sigiente:
E korona, ta símbolo di un Reina (St. Elisabeth); e arko ta nifiká sleiru di un sùr i Hòspital bou di un dak. E forma blou ta para pa St. Elisabeth ekstendiendo su man pa yuda i e koló hel ta simbolisá katolisísmo, sosten spirituál. E kombinashon di e kolónan hel i blou ta simbolisá e unidat médiko i spirituál. A skohe e logo aki den kuadro di selebrashon di 150 aña di eksistensia di Hòspital St. Elisabeth.

Informashon di kontakto

Breedestraat 193
Otrobanda
Willemstad, Curaçao

Yamadanan sentral
(+5999) 462 4900 of 910